वास्तुप्रवेश

रविवार दिनांक 1 फेब्रुवारी 2009 हा आपल्या शाळेच्या इतिहासातला एक हृद्य दिवस म्हणून स्मरणात राहणार आहे. शाळेच्या नव्या इमारतीच्या तळमजल्यावरील सभागृहात श्री गणेश आणि श्री सरस्वति ह्या विद्येच्या देवतांचे विधिवत्‌‌ पूजन करून प्रवेश करण्यात आला.

मंडळाचे आद्य अध्यक्ष कै. श्री. अप्पासाहेब ठाकरे ह्यांचे चिरंजीव आणि सध्या मंडळाचे खजिनदार असलेले श्री. प्रफुल्ल ठाकरे आणि त्यांच्या सुविद्य पत्नी सौ. क्षमा ठाकरे ह्यांच्या शुभहस्ते ही पूजा करण्यात आली. सोबतच्या चित्रामध्ये मंडळाचे संकुल प्रमुख श्री. सदाशिव परांजपे आणि त्यांच्या सुविद्य पत्नी सौ. शैला परांजपे शुभप्रवेशप्रसंगी ठाकरेदंपतीचे स्वागत करताना दिसत आहेत.

हा सोहळा पाहण्यासाठी श्री. सुरेश ठाकूर ह्यांचे पार्ले टिळक विद्यालयातील शिक्षक आणि आपल्या शाळेचे देणगीदार श्री. साने सर आवर्जून उपस्थित होते.

दरवर्षी गाजणारा बालोद्यानातील विद्यार्थ्यांच्या आणि पालकांच्या आवडीचा बाहुला-बाहुलीच्या लग्नाचा सोहळा नंतर ह्या सभागृहात उत्साहाने साजरा झाला. कार्यक्रमासाठी नवी वास्तू उपलब्ध झाल्याने विद्यार्थ्यांच्या आणि शिक्षक-शिक्षकेतरांच्या उत्साहाला उधाण आले होते.

ह्या प्रसंगी श्री. विक्रम ठाकरे व श्री. कौस्तुभ ठाकरे ह्या ठाकरे घराण्याच्या पुढच्या पिढीतील शाळेच्या माजी विद्यार्थ्यांतर्फे रु.1,00,001/- रुपयांची देणगी घोषित करण्यात आली.

शाळेचे आणखी एक आदर्श माजी विद्यार्थी श्री. विजय यशवंत म्हसकर ह्यांच्यातर्फे रु.50,000/- रुपयांची तर बालोद्यान शाळा समितीच्या अध्यक्षा सौ. मेधाविनी कुलकर्णी ह्यांच्यातर्फे रु.25,000/- ची देणगी देण्यात आली.

श्री. विकास पाटणेकर, श्री. राहुल केळकर, श्री. निशिकांत हंबीर आणि श्री. गांधी ह्यांनीही देणग्या दिल्या. जय व जाई ह्या बाहुला-बाहुलीच्या लग्नानिमित्त अशा रीतीने घसघशीत अहेर मिळाला.

इयत्ता 10 वी चा निरोप समारंभ, बालोद्यानाचे शिबिर आणि इ.4 थी चे निवासी शिबिर हे कार्यक्रमही लवकरच ह्या सभागृहात आयोजित होणार आहेत.

छाया – श्री. निशिकांत हंबीर